Пашыраны тэкставы рэдактар, супольнасці, знікальныя паведамленні ў групах, 350 мільёнаў анімацый

Лета пераацэньваюць. Затое сёння абнавіўся Telegram, і цяпер у Вас ёсць:

• Пашыранае фарматаванне для стварэння блогаў, артыкулаў і доўгіх допісаў.

  • Табліцы, спісы, загалоўкі, цытаты, устаўка фота і відэа і многае іншае.
  • Зручны візуальны рэдактар, аптымізаваны для мабільных прылад і камп'ютараў.
  • Генерацыя тэксту, формул або табліц з дапамогай AI-інструментаў.
  • Больш за 32 000 сімвалаў у адным паведамленні.

• Супольнасці — інструмент для аб'яднання каналаў, груп або ботаў.

  • Далучэнне да іншых чатаў супольнасці без запрашальнай спасылкі.
  • Пераход да ўсіх чатаў супольнасці праз адзін пункт у спісе чатаў.
  • Магчымасць выбраць, хто зможа дадаваць новыя чаты ў Вашу супольнасць.

• Знікальныя паведамленні ў суполках — адказы ад ботаў, якія бачныя толькі Вам.

  • Адпраўка нябачных каманд ботам і прыватныя адказы ад іх у тым жа чаце.
  • Чаты без вітанняў і кароткіх зместаў ад ботаў, прызначаных для асобных удзельнікаў.

• 350 мільёнаў GIF-анімацый — і новы, паскораны пошук па іх.

  • Магчымасць знаходзіць якасныя GIF, аптымізаваныя для Telegram (YMMV).
  • Ніякіх іншых сэрвісаў і поўная канфідэнцыяльнасць запытаў.
  • Так што, можа, і лета — не такое ўжо і дрэннае.

Пашыраны тэкставы рэдактар

Мы ведаем, што Вы не надта ўмееце выказвацца словамі. Таму мы дадалі да халеры новых анімацый убудаваны тэкставы рэдактар з падтрымкай загалоўкаў, табліц, спісаў, цытат і блокаў кода. З яго дапамогай таксама можна дадаваць фота і відэа проста пасярэдзіне паведамлення.

Калі ж словы ўсё-такі спатрэбяцца, AI-інструменты на базе Cocoon дапамогуць згенераваць «Вашы» тэксты з захаваннем поўнай канфідэнцыяльнасці.

Як і ў выпадку з пашыраным фарматаваннем для ботаў, рэдактар дазваляе адпраўляць да 32 768 сімвалаў у адным паведамленні. Настаў час паказаць машынам, на што здольны чалавечы графаман.

На дадзены момант новы рэдактар даступны карыстальнікам з падпіскай Telegram Premium. Чаму толькі ім? Так уладкаваны наш капіталістычны рай за жалезнай заслонай блакіровак.

Супольнасці ў Telegram

Цяпер некалькі груп, каналаў і ботаў можна аб'яднаць у тэматычную супольнасць. Удзельнікі супольнасці могуць бачыць усе чаты і імгненна далучацца да іх. Заснаваць уласную секту яшчэ ніколі не было так проста.

Чаты ў супольнасці могуць быць бачныя ўсім удзельнікам або схаваныя ад усіх, акрамя кіраўнікоў супольнасці і ўдзельнікаў гэтых чатаў. Бо не бывае секты без таемнай групы для вярхоўных жрацоў з кулінарнымі рэцэптамі.

Супольнасці робяць спіс чатаў больш кампактным. Вы можаце наладзіць адлюстраванне супольнасці ў выглядзе аднаго чата, які разгортваецца пры адкрыцці, — або ў выглядзе звыклых асобных чатаў.

Па змаўчанні супольнасці адкрытыя для сумеснай творчасці: любы ўдзельнік можа дадаваць новыя чаты — але Вы можаце спыніць гэтую практыку ў наладах (напрыклад, пад падставай барацьбы з каранавірусам). У гэтым выпадку ўдзельнікі змогуць толькі прапаноўваць новыя чаты.

Знікальныя паведамленні для ботаў

Гасцявы рэжым дазваляе запытваць у ботаў інфармацыю ў любым чаце. З сённяшняга дня можна не загрувашчваць запытамі і адказамі суполку для астатніх удзельнікаў.

Цяпер боты ў групах могуць адпраўляць паведамленні, якія бачыць толькі адрасат, — напрыклад, прывітанні, кароткія зводкі ад AI, паведамленні пра памылкі, запыты на пацвярджэнне або меню з кнопкамі.

Боты могуць адпраўляць знікальныя паведамленні самастойна або ў адказ на пэўныя каманды, пазначаныя ў меню бота спецыяльным значком. Паведамленні з такімі камандамі таксама бачныя толькі боту і карыстальніку, які іх адправіў.

Распрацоўшчыкі ботаў могуць больш падрабязна азнаёміцца са знікальнымі паведамленнямі ў кіраўніцтве.

350 мільёнаў анімацый

Дарэчы, пра недахоп слоў: цяпер у панэлі GIF даступны пошук па больш чым 350 мільёнах GIF на 36 мовах. Абноўлены пошук працуе дзякуючы афлайн-індэксацыі папулярных агульнадаступных GIF з дапамогай AI-мадэляў з адкрытым зыходным кодам.

У адрозненне ад усіх іншых месенджараў, у Telegram пошук GIF-анімацый цалкам канфідэнцыйны, не залежыць ад іншых сэрвісаў — а цяпер яшчэ і працуе значна хутчэй, чым раней.

Вось, Вы ўсё прачыталі. Цяпер час ісці па марозіва.

14 ліпеня 2026,
Каманда Telegram